الشبكة الاردنية للهندسة المدنية - الواحة الاكاديمية - الفرق الجوهري بين السيراميك و البورسلين

ايه الفرق الجوهري بين #السيراميك_والبورسلين ؟

السيراميك:

1- لو جيت تبص على أى بلاطة سيراميك هتلاقيها مكونه من عجينتين، بالنسبة للظهر هتلاقي لونه زي الفخار كدا وعليه مربعات أو معينات، ودا اللي بيمسك مع المونه الأسمنتية بكل سهولة، أما لو جيت تبص للوش بتاع السيراميك هتلاقيه ناعم أملس وغالبا بتكون ملونه وعليها التصميم ودي بنسميها طبقة مزججة، والطبقة دي بتكون مقاومة للاحتكاك والبري والخدش والتآكل.

2- بما إن البلاطة السيراميك معموله من عجنتين فعادة كل مقاسات السيراميك بتكون صغيره ومتوسطه ( 30×30 سم – 40×40 سم – 50×50سم – 60×60 سم) ودا يعتبر اكبر مقاس في السيراميك لان انا لو كبرت المقاس عن كدا البلاطه هتتكسر.

3- الحافة بتاعت السيراميك لو دققت فيها كويس هتلاقيها جايه ب curve كدا ممكن متلاحظوش لانه بيكون حاجه صغيره كدا 2 مم، فلما أحط بلاطه جمب بلاطه هتلاقي فيه بينهم فراغ، والفراغ ده بنسميه عراميس.

إزاي بنركب السيراميك ؟

– لما أجى أركب السيراميك علي الحوائط قدامي حاجه من إتنين، إما أركب بمونه أو أركب بمادة لصق ودا هيتركب علي المحارة.

1- الصنايعي لما بيجي يشتغل بيبدأ من تحت لـ فوق، ولو فيه عندي غلاقه يبدأ من تحت بالغلاقه.

2- لما أبدأ شغل سيراميك الصنايعي بيعمل حاجه إسمها أد سيراميك، يعني بيعمل صف من السيراميك في كل اتجاه ولما يخلصه أطلع أستلمه.

3- لو عندي بريزه في الحيطه مبقطعش في أربع بلاطات ولا حتي اتنين، الصح إن أقطع في ركن بلاطه أو في نص بلاطه (بس الحل ده هيكون صعب علي الصنايعي ) وعشان أظبط علب الكهرباء في أحد أركان البلاطه بسيب العلب دي حره في الحمام والمطبخ واللي بيثبتهم هو المبلط.

4- ممنوع أقطع في بلاطة ديكور أو بلاطه ستللو.

5- اوعي تركب السيراميك الخشن بتاع الباركيه إلا لو انت واقف مع الصنايعي وهو بيسقي، ومتخليهوش وهو بيسقي يبهدل الحيطه، الصح إنه يسقي كل عرموس لوحده، لأن مونه السقية لو جيت علي البلاطه الخشنة مش هتنضف بسهولة، واحذر إنك تنضف السيراميك بماية نار.

6- لازم السقة تتعمل مظبوط لانها لو متعملتش مظبوط الشغل هيطلع شكله مش لطيف.- لما أجى أركب السيراميك فى الأرض اخد بالي من شوية حاجات:

1- الأفقية، ونعمل ميل في الحمام والمطبخ لو كان فيه بيبه.

2- علاقة المنسوب بالشرب.

3- الرمل اللي هيركب بيه السيراميك لازم يكون رمل نضيف وقبل ما نركب السيراميك علي الرمل ننسمه بشوية مايه.

4- الوزرة بتكون دايما من نفس بلاطة الأرضية وارتفاعها بيكون 10 سم، ولازم الوزرة تكون أفقية وعلي استقامة واحدة، والأفضل ان الزق الوزرة علي المحارة بمادة لزق.

ايه هيا الشركات اللي بتنتج السيراميك؟

1- الجوهرة: ده يعتبر أفضل نوع موجود في مصر وأغلى، لأنه خامات مستوردة وصناعة مصرية.

2- كليوبترا: خامات مصري وصناعة مصري.

3- ليسكو : اللي هو القيشاني وده رخيص.

4- السيراميك الغير مصري : (امارتي – هندي – اسباني – صيني ).

بالنسبة للفرز :

الفرز الاول : لا يوجد به عيوب.الفرز الثاني : ممكن تلاقي بلاطه فيها حتت تقويسه كدا وكمان ممكن تلاقي بلاطه مقاسها اكبر من مقاس بلاطه تانيه ب 2 مم ولا حاجه.

—————————————–

البورسلين:

1- لو جيت تبص علي أي بلاطه بورسلين هتلاقيها مكونه من عجينة واحدة، ووشها زي ظهرها، كل الفكرة إن طبقة الوش واخدة طبقة جليز وبقت بتلمع، لكن الظهر لا، ولكن هي نفس الخامة وعجينة واحدة.

2- بما إن البلاطه البورسلين معموله من عجينه واحده ف أقدر اعمل منها مقاسات كبيرة، وطبعا البورسلين اقوي صلابه وصلاده من السيراميك.

3- أغلب البورسلين اللي هتلاقيه موجود حاليا في السوق حاجه اسمها ليزر cut اللي هو البلاطه مقطوعه بالليزر عشان كدا البورسلين هتلاقيه مقطوع بدقه عاليه والزاوية بتاعت القطع بتكون قائمه تماما، وعشان كدا لما أحط بلاطتين بورسلين جمب بعض مبيكونش فيه بينهم لحام وده من مزايا البورسلين إنك لما تركبه بيبان كأنه قطعه واحده.

إزاي بنركب البورسلين ؟

المشكله اللي بتواجهني مع البورسلين إن ضهره ناعم، بالتالي التماسك بينه وبين المونه الاسمنتيه بيكون ضعيف، ودا اللي بيخلي البورسلين بعد فتره من تركيبه بيفك، كمان البورسلين قطع ليزر ومفيش لحامات بين البورسلينه والتانية فـ لما يجي يحصل تمدد وانكماش البلاطه بتقب وتفك من المونه، ومن المعروف البورسلين من الحاجات اللي التمدد الحراري بتاعها كبير، وعشان كدا لايستحب علي الاطلاق إننا نلزق البورسلين بالمونه، البورسلين بيركب بمادة لزق جاهزة، عشان كدا الطريقة الصحيحة لتركيب البورسلين كالتالي:

1- أول يوم بطلع البورسلين من الكراتين بتاعته وأحطه على ظهره وأدهنه بمادة لزق جاهزة مدعمة بـ أديبوند، وبعدين أمسك حاجه زي الشوكة الكبيره كدا وأمشط الظهر.

2- بجيب رمل وأرشه علي ظهر البورسلين، وأسيبه لمدة 24 ساعه، كدا ظهر البورسلين متخشن وضمنت لما أحطه علي مادة الزق هيمسكوا في بعض كويس جدا. أنواع البورسلين:

1- صيني: ودا متتعاملش معاه لأنه غير مطابق للمواصفات العالمية.

2- إماراتي – هندي: والهندي سعره ارخص من الإماراتي.

3- الاسباني: ودا أحسن حاجه موجوده.

———————————————–

طيب ايه الحالات اللي بلزق بيها البلاطه بمادة لزق جاهزه ؟

1- لو كانت البلاطه دي بورسلين. ومينفعش استخدم مادة لزق جاهزة فوق الرمل لازم الأول اعمل طبقة لياسه تحتها الأول والكلام ده برضوا ينطبق لو انا هحط بورسلين علي الحوائط.

2- لو كان عندي بلاطة سيراميك ومقاستها كبيرة وخصوصا لو هتتلزق علي الحائط .

3- لو كانت البلاطه اللي عندي صغيره جدا وصعب إن اظبها بالمونه.

ازاي نستلم السيراميك أو البورسلين:

1- وانت طالع تستلم السيراميك لازم تراجع علي مخارج السباكة.

2- أتأكد من علاقة السيراميك بالشرب.

3- أتأكد إن البلاطه مش مسننه أو محرفه.

4- أتأكد إن السيراميك كله مفهوش خدش.

5- أتأكد من سلامة البلاطه.

6- أتأكد إن مفيش بلاطه مطبله، ولما تيجي تشوف البلاطه مطبله ولا لا، تشوف من جمب البلاطه مش من نصها لان البلاط عادة بيطبل من الجناب.

7- أتأكد من الأفقية عن طريق الإدة والميزان.

8- أحط الزاوية المعدن بين الوزرة والأرض عشان اتأكد انها رأسية.

9- أبص علي السقيه وأتاكد إنها مكوية ومفهاش تسويس.