اسئلة شائعة عن منحة نيوزيلندا:
متى التقديم؟
التقديم لمنحة نيوزيلندا بدا ورح يكون من 1-2 ل28-2.
اذا تخصصي مش موجود في بقدر اقدم؟
للأسف لا. لا تغلب حالك وتقدم لانه هم طالبين تخصصات محددة.
هل المنحة تطلب ايلتس؟
المنحة ما بتطلب ايلتس, لكن في حال حصلت قبول رح يطلبو منك ايلتس عشان
تقدم للجامعة. لكن حتى لو ما جبت العلامة المطلوبة رح يدعموك تاخذ كورس لغة
في نيوزلندا على حساب المنحة. يعني باختصار الايلتس غير مطلوب.
هل المنحة تشترط خبرة للتقديم؟
نعم تشترط خبرة سنة اذا كان الشغل اكثر من 30 ساعة بالاسبوع, وسنتين اذا
الشغل اقل من 30 ساعة بالاسبوع . لكن مش شرط تكون خبرة شغل مدفوع, ممكن
يكون شغل غير مدفوع او حتى تطوع.
هل المنحة تدعم دراسة البكالوريس؟
لأ. المنحة تدعم فقط ماجستير ودكتوراة.
في عمر محدد للمنحة؟
لا, المهم فوق 18 سنة.
كيف ازيد من فرص تقديمي للمنحة؟
عشان تزيد فرصك لازم تمشي زي ما بدهم. زكر بالجملة التالية:
“المنحة بتدور على ناس بتخصصات معينة عشان يدرسو في نيوزيلندا ويرجعو على بلدهم عشان يساهمو في تنميتها”
وبناء على هالحكي نقدر نحكي انه لازم يكون تخصصك من ضمن التخصصات
المطلوبة. والشغلة الثانية لازم تبينلهم بالطلب انه في مشكلة بالاردن بدك
تحاول تساهم في حلها من خلال دراستك بنيوزيلندا. ركز على الاردن بالطلب
تبعك وانه عندك خطة شو رح تعمل بس ترجع. وخلي خطتك واقعية ومفصلة قدر
الامكان.
شو التخصصات المطلوبة للمنحة؟
بتلاقوها هون:
اختارو الاردن وشوفو تخصصكم
https://www.mfat.govt.nz/…/study-subjects-we-recommend-for…/
شو رابط التقديم؟
التقديم يبدا من هون:
https://scholarship.force.com/Scholar/s/eligibility-test
شو في نصائح عامة؟
– لا تستنى لاخر يوم عشان تبلش تعبي الطلب. ابدا عبي بدري عشان تلاقي وقت
تبحث عن معلومات والجامعات اللي بدك تقدملها وعشان تلحق تدقق عالطلب تبعك.
– خليك واقعي وبينلهم انك متعلق بالاردن وبدك تفيدها من خلال دراستك.
– لما تعبي معلومات دايما خلي حكيك ضمن نطاق السؤال. يعني مثلا اذا في
سؤال يحكي عن شو ناوي تقدم للاردن, لا تحكي عن قوة التعليم بنيوزلندا, ولا
تحكي عن حالك. التزم بالسؤال. وضلك ذكر نفسك بالسؤال.
– لا تخلي حدا
يقدم عنك. قدم لحالك. اقرا التعليمات الموجودة بالموقع رح تكون كافية
ووافية. مش محتاج ابدا تدفع مصاري لحدا عشان يقدم عنك. حتى لو ما مشي
الحال, عالاقل بتكون تخذت خبرة بالتقديم للمنحة هاي وغيرها.
– بالنسبة
لفكرة البحث برجع اذكرك تكون واقعي وتكون مشكلة ظاهرة بالاردن وحاول تجيب
امثلة للمشكلة بالاردن وامثلة لكيف نيوزلندا عندها حلول. امثلة محددة.
-نصيحة اخيرة تنطبق على منحة نيوزيلندا وكل المنح, لا تكتب كلام عام. كلام
اي حدا يقدر يحكيه. خليك دايما محدد بكلامك ومبين انك قرأت وبحثت. مثلا:
لا تحكي انا بدي ادرس بنيوزيلندا لانها بلد التعليم فيها قوي وهي بلد
متطورة …
احكي انا اخترت نيوزيلندا لانه عندهم جامعة كذا عملت ابحاث
كذا بتخصصي و لأنه نيوزيلندا عملو مشروع كذا السنة الفلانية وكان هالمشروع
نقلة كبيرة.
وبالتوفيق للجميع ان شا الله
